2019թ. ապրիլի 1-ին ԵՊՀ ԻՄ-ի պատվիրակությունը հյուրընկալվեց Վալանսի հայկական ռադիոյում: Նրանց ջերմորեն դիմավորեցին ռադիոյի տնօրեն պարոն Րաֆֆի Ստեփանյանը և հաղորդավարուհի տիկին Սուսաննա Փահլևանյանը, ով վարում է «Հարցազրույց» խորագրով հաղորդումը: Տիկին Սուսաննան ռադիոյի ուղիղ եթերում հարցազրույց ունեցավ մասնաճյուղի ուսանողների հետ:
Հաղորդման սկզբում նա ռադիոլսողներին ներկայացրեց պատվիրակության անդամներին և նշեց, որ իրենք հպարտ են հյուրընկալելու Հայաստանի Հանրապետության վարչապետ Ն.Փաշինյանի ֆրանսերենի ուսուցչուհի Ա.Մարդանյանին և ԵՊՀ Իջևանի մասնաճյուղի ուսանողներին:
Այնուհետև տիկին Մարդանյանը խոսեց Վալանս-Իջևան բարեկամական կապերի, ուսանողների փոխանակման ծրագրի, հյունկալող ընտանիքների ջերմ ընդունելության մասին: Նա ընդգծեց փոխանակման ծրագրի վիթխարի նշանակությունը՝ լեզվական և մշակութային առումներով: Ա.Մարդանյանը շնորհակալություն հայտնեց հրավիրող կողմի թիմին, ինչպես նաև Իջևանի գինու և կոնյակի, «Բենտոնիտ», «Քարարտ» գործարանների ղեկավարությանը, Իջևանի քաղաքապետարանին, Սևքարի, Աչաջրի, Գետահովիտի, Գանձաքարի գյուղապետարաններին՝ այցի կայացմանն աջակցելու համար:
Այնուհետև հաղորդավարի արհեստավարժ հարցերի միջոցով, անկաշկանդ մթնոլորտում ուսանողները պատմեցին իրենց տպավորությունների, «Մաեստրիս» բարձրագույն դպրոցում ստացած գիտելիքների, հյուրըկալող ընտանիքների մասին:
Spread the article
