2018թ. ապրիլի 25-ին ԵՊՀ Իջևանի մասնաճյուղում մեկնարկեց «Մարզային երիտասարդների գործազրկության հաղթահարումն անհատական զարգացման միջոցով» դասընթացը:

Ապրիլի 18-ին Իջևանը պաշտոնապես ճանաչվեց 2018 թվականի երիտասարդական մայրաքաղաք: Այս դասընթացը երիտասարդական մայրաքաղաքում իրականացվող առաջին ծրագիրն է, որը ՀՀ սպորտի և երիտասարդության հարցերի նախարարության դրամաշնորհային ծրագրի շրջանակներում կազմակերպել է «Հայկական գիտական միավորում» ՀԿ-ն:

 Ծրագրի պատասխանատուն է ԵՊՀ ԻՄ-ի ՈՒԳԸ համակարգող Սլավիկ Ալավերդյանը, աջակիցներն են Շրջանավարտների և կարիերայի կենտրոնը (ի դեմս՝ Արփինե Եգանյանի), Ուսանողական խորհուրդը (ի դեմս՝ Իսկուհի Շաղբաթյանի):

Դասընթացին մասնակցելու համար մեկ ամիս շարունակ դիմել էին ԵՊՀ Իջևանի մասնաճյուղի ուսանողներ, շրջանավարտներ, Իջևան քաղաքի ու հարակից համայնքների 18-30 տարեկան երիտասարդներ: Մասնակցության համար ընտրվել էին 50 երիտասադներ:

Դասըթնացի բացման խոսքով հանդես եկավ ծրագրի պատասխանատու Սլավիկ Ալավերդյանը: Նա համառոտ ներկայացրեց «Հայկական գիտական միավորում» ՀԿ-ի գործունեությունը, ծրագրի կառուցվածքը, ժամանակացույցը, սեմինարավարներին և կոչ արեց սեմինարների ընթացքում լինել ակտիվ:

1-ին սեմինարը վարեց Հայոց լեզվի և գրականության ամբիոնի դոցենտ, բ.գ.թ. Վահան Աղաբաբյանը: Նա ներկայացրեց CV-ի և ռեզյումեի դերը աշխատանք փնտրողի և գործատուի համար, CV-ի կառուցվածքը, գրագետ CV կազմելու քայլերը, այն կետերը, ինչին ավելի շատ են ուշադրություն դարձնում գործատուները և CV կազմելիս տարածված սխալները:

Ապրիլի 26-ին տեղի ուենցավ 2-րդ սեմինարը, որը վարեց Անգլերեն լեզվի և գրականության ամբիոնի դասախոս Աստղիկ Սիմոնյանը: Նա համառոտ ներկայացրեց CV-ի կառուցվածքը, ցանկալի տեսքը և ծավալը, բերեց տարբեր CV-ների օրինակներ, այնուհետև մասնակիցները բաժանվեցին թիմերի և պատրաստեցին CV-ներ: Յուրաքանչյուր թիմ ներկայացրեց իր CV-ն, մասնակիցները տվեցին հարցեր, սեմինարավարը նշեց թերությունները, իսկ վերջում մասնակիցները գնահատեցին թիմերի աշխատանքը:

Դասընթացի շրջանակներում մինչև մայիսի 1-ը կկայանա ևս 3 սեմինար՝ էլեկտրոնային նամակագրություն վարելու, գործատուին ճիշտ ներկայանալու, աշխատանքային օրենսդրության հիմնական դրույթների և գործատու-աշխատող իրավահարաբերությունների կանոնակարգման առանձնահատկությունների վերաբերյալ:

Դասընթացի վերջում բոլոր մասնակիցներին կտրվեն մասնակցության վկայականներ։